Грижа за себе-Совет 11: Фит во секојдневниот живот

Пет вежби за енергија за да се чувствувате подобро и повитално во секојдневниот живот

Потчукнете се по рамото и дајте си комплимент: Леле, совладав толку многу работи! За добро да се помине денот, помагаат кратките серии на вежби. Тие можат да се изведуваат попатно и се предвидени пред сè: да ве направат среќни и да ви дадат чувство дека добро се грижите за себе. Така полесно стануваат навика. „Дури и кратките раздвижувања во секојдневниот живот имаат позитивен ефект врз здравјето: не само што се зајакнуваат кардиоваскуларниот систем и мускулите, туку имаат корист и мозокот и нервните клетки“, објаснува спортскиот научник и ментален тренер Miriam Urch. Повременото раздвижување е добро и за телото и за психата. Пробајте!

5 едноставни вежби за повремено раздвижување

Вежба 1: нишање со стапалата

Инструкции: застанете со двете стапала на подот, во ширина на колковите. Најпрво кратко подигнете ги предните делови од стапала за да застанете само на петиците. Потоа префрлете се на прстите. Држете ја оваа позиција три секунди. Вратете се на почетната позиција. Овој пат, прво застанете на прстите, а потоа на потпетиците. Задржете ја оваа позиција повторно три секунди. Вратете се на почетната позиција. Повторете ја целата вежба десет пати.
Придобивка: ги зајакнува мускулите на нозете
Време и место: додека ги миете забите или за време на паузата за кафе

Вежба 2: стегнување на карличното дно

Инструкции: Здравото карлично дно го стабилизира 'рбетот, обезбедува исправено држење и важи за центар на силата. Тоа е важно за сексуалноста и за одржување на континенцијата. Следната вежба за зајакнување помага во секојдневниот живот: Стегнете го карличното дно три до пет секунди и опуштете го десет секунди. Се препорачуваат 50 до 100 контракции во текот на денот.
Придобивка: го зајакнува карличното дно
Време и место: додека чекате автобус, додека седите во канцеларија

Вежба 3: кружење со рацете

Инструкции: Земете во секоја рака по едно полно шише со вода. Застанете исправено и напнете го стомакот. Држете ги раширените раце странично и високо. Правете мали кружни движења со раширените раце. Можете да кружите напред или назад. Повторете ја вежбата три пати по десет секунди. Ако стоите на прстите на нозете за време на кружењето со рацете, го тренирате целото тело.
Придобивка: ги зајакнува рамењата и мускулите на горниот дел од грбот
Време и место: повремено за време на работата, за време на паузата во парк

Вежба 4: свиткување на колената

Инструкции: застанете исправено пред стол и со стапалата во ширина на колковите. Прстите на нозете нека бидат малку насочени кон надвор. Тежината добро распоредете ја на стапалата. Погледот насочете го директно напред. Петите остануваат на подот за време на вежбата. Затегнете го задникот накратко. Сега спуштајте се полека и контролирано додека ги носите рацете нанапред. Запрете непосредно пред да го допрете задникот на седалото на столот. Напнатиот 'рбет треба да остане исправен. Сега користете ги нозете за да го турнете телото назад во стоечка положба и повторувајте го процесот. На почетокот, доволни се неколку повторувања. Важно е вежбите да се изведуваат правилно. 
Придобивка: се користат многу мускулни групи и затоа е оптимална вежба за целото тело. Примарно ги зајакнува мускулите на задникот и бутовите, но и на долниот дел на грбот, стомачните мускули и рамењата.
Време и место: во канцеларија односно на работа, во трпезаријата, одвреме-навреме

Вежба 5: свесно дишење

Инструкции: Во стресни ситуации имаме тенденција да дишеме само со градите. Ова ја зголемува фреквентноста на дишењето и го става организмот под стрес. Вежбите за дишење како овие се погодни за кратко повремено релаксирање: Затворете ги очите. Ставете ја едната или двете раце на стомакот. Вдишете низ носот и свесно почувствувајте како се крева стомачниот ѕид додека вдишувате. Издишете низ носот и почувствувајте како вашиот стомачен ѕид се спушта назад. Совет: Замислете како свежа енергија тече во вашето тело додека вдишувате. Како што издишувате, ослободете ја напнатоста.
Придобивка: го релаксира организмот
Време и место: речиси секогаш, освен додека возите

Заклучок: Вклучувањето на кратки вежби за раздвижување во секојдневниот живот бара одредена дисциплина. Но, откако тие ќе ви станат навика, ќе имаат траен позитивен ефект врз телото и психата.

Предностите на брзите вежби со движење накратко:

• го зајакнуваат кардиоваскуларниот систем и мускулите
• мозочните и нервните клетки имаат корист од нив
• техниките на дишење делуваат релаксирачки