Грижа за себе-Совет 7: Свесна рутина за убавина

На овој начин можете да го активирате вашето тело за само неколку минути со четкање на телото (Body Brushing)

Обидете се да најдете барем пет минути секој ден за себе: Развијте свесна рутина за убавина. Можете да го направите ова со вклучување на смирувачки ритуали за нега на лице и тело тогаш кога и онака го миете лицето, се туширате или ги четкате забите. Пет минути се доволни. Мал, секојдневен домашен спа-ритуал е повеќе од само нега на кожата. Ја разгалува и душата. Во време на стрес, немир или промени, ова дава одреден степен на стабилност. Телото и духот добиваат сигнал да бидат вредни, важни и добро негувани. „Кожата е нашиот најголем орган, видлив за секого и огледало на душата. Затоа е многу важно да се чувствувате пријатно во сопствената кожа. Со свесни рутини за убавина ќе можете ефективно да направите нешто во врска со тоа “, вели дерматологот Katharina Medek. Нејзиниот совет: угодувајте си и редовно наградувајте се со негувачки допири. „Вака му враќате нешто на вашето тело, бидејќи тоа секојдневно прави многу.“ Дали сакате да внесете нова рутина за убавина во вашата бања? Обидете се со четкање на телото.

1 - Четкање на телото: преглед

При четкањето на телото, целото тело го четкате на сува кожа. Се што ви треба е четка направена од средно цврсти природни влакна и пет минути од вашето време. „При изборот на четка внимавајте да не е премногу цврста или премногу мека и да има навистина природни влакна“, препорачува дерматологот. Најважното: Секогаш четкајте во правец кон срцето, тоа го активира лимфниот проток. Лимфниот систем работи паралелно со крвотокот. Пренесува и чисти течност од ткивата, затоа важи за „одлагач на ѓубрето“ на телото. Во идеален случај треба да започнете со две до три четкања на телото неделно. Подоцна, кога вашето тело ќе се навикне на тоа, можете да го практикувате секој ден. Внимание: Користете го методот на четкање само на здрави површини на кожата и никако на проширени вени. Ако не сте сигурни, разговарајте со вашиот дерматолог однапред.

2 - Четкање на телото: ефект

Четкањето на телото помага да се стимулира протокот на крв и васкуларниот систем. Исто така, има ефект на детоксикација и пилинг. Мртвите клетки од кожата се отстрануваат и нервните завршетоци се стимулираат. „Со отстранување на клетките на кожата, се поттикнува клеточното обновување на кожата. Таа ќе изгледа помазно и поцврсто“, објаснува Katharina Medek. Бидејќи четкањето на телото е форма на допир, се лачи хормонот окситоцин, слично како и при масажата. Ова создава пријатно, топло чувство. „Четкањето на телото е повеќе од само механичко четкање на кожата, тоа позитивно влијае и на психолошката благосостојба“, нагласува докторката. Четкањето, исто така, може да биде благотворно и за напнати мускули, но сепак нема научни докази за тоа.

3 - Четкање на телото: подготовка

За да постигнете најдобар ефект, посегнете по четката за четкање на телото наутро пред туширањето. Отворете го прозорецот и оставете нека влезе свеж утрински воздух. Земете ја четката и четкајте со неа еден по еден дел од телото во нагорен правец. Или директно под сув туш или во бањата на подот со плочки. Уште еднаш да ве потсетиме: секогаш во правец кон срцето, односно со движење нагоре. Можете да го четкате целото тело или само поединечни делови. Практикувајте четкање на телото само неколку минути, прекумерното триење може да ја оштети кожата. Четката треба да се менува од време на време.

4 - Четкање на телото: процес

Се разбира, ако баш сакате, можете да ги следите точните упатства. Но, дерматологот Katharina Medek советува да ѝ верувате на вашата интуиција. „Вие најдобро знаете како сакате да се допирате и што е толку добро за вас што би сакале да го правите тоа редовно.“ Точниот редослед е помалку важен отколку да се предадете на моментот и да се опуштите. Единственото правило за поттикнување на лимфната дренажа е: Секогаш тријте со четката во правец кон срцето. Разумно би било, на пример, да се четкаат следните делови од телото еден по друг со бавни, кружни движења: нозете, рацете, задникот, стомакот, градите, грбот (ако е можно). Најдобро е да го избегнувате лицето, за тоа ќе ви треба посебна, помека четка.

5 - Четкање на телото: нега потоа

По четкањето, кожата е на некој начин свежо излупена. Затоа е паметно во овој момент да одите под туш и да ги исплакнете мртвите клетки на кожата. После тоа, кожата е особено впивлива, објаснува дерматологот. Идеално време да ѝ нанесете путер за тело со освежувачки мирис или висококвалитетно масло за тело: кремастите, мрсни текстури ја разгалуваат кожата и ја прават нежна. Мирисите и аромите кои ги содржат можат да имаат релаксирачки, активирачки или пријатен ефект. „По нанесувањето на крема, вие сте особено добро подготвени за претстојниот ден“, вели Katharina Medek.

6 - Четкање на телото: радост од допирање

Исто така, добро е нежно да се допирате рано наутро. Ова предизвикува пријатни чувства и го активира центарот за наградување во мозокот. Топлата рака на кожата ги стимулира топлинските рецептори. „Топлината може да влијае на емоциите и расположението. Тоа предизвикува чувство на благосостојба и пријатност и води кон лачење на серотонин“, пишува невронаучникот Rebecca Böhme во нејзината книга „Човечки допир – зошто физичката близина е толку важна“ (Издавач: C. H. Beck, 2019 г.). И дерматологот Katharina Medek исто така нагласува: „Допирите се од суштинско значење за среќен живот.“

Заклучок: Свесните рутини за убавина, како што е четкањето на телото, се чиста грижа за себе и го разгалуваат телото со пријатни допири.

Четкањето на телото е добро, бидејќи:

• наутро ви дава елан
• делува прочистувачки – надворешно и внатрешно
• има затегнувачки пилинг-ефект на кожата