Чистење на рерна – најпаметните методи

Чистењето на запечената рерна е еден од најголемите секојдневни предизвици во кујната. Досаден резултат се запечени дамки, со тек на време кафеав филм на стаклото на рерната и тврдокорни црни наслаги кои тешко се отстрануваат.

Меѓутоа, кој паметно ќе пристапи кон чистењето на рерната, може да постигне добар резултат. За вас ги одбравме некои од најпопуларните методи и домашни средства за чистење на рерната.

dm дрогерие маркт

Време за читање 5 Мин.

•

4/16/2026

Кои безбедносни мерки треба да се почитуваат при чистење на рерна?

При чистењето на рерната важно е да преземете одредени безбедносни мерки за да се заштитите. Ве молиме носете заштитни ракавици за да избегнете иритации на кожата и контакт со евентуално агресивни средства за чистење. Исто така, добро проветрете ја просторијата за да го намалите влијанието на можни испарувања. Пред да започнете со чистењето, уверете се дека рерната е целосно изладена за да избегнете изгореници.

Пиролиза: заштедува време и темелно чисти

Модерните рерни може да се чистат со помош на пиролиза. Тоа е физички систем на само-чистење при кој рерната се загрева до неколку стотици степени во тек на неколку часа, поради што нечистотијата и наслагите се распаѓаат во пепел која лесно се отстранува. Овој начин на чистење не подразбира употреба на хемикалии, но троши многу струја, а шпоретите со оваа функција се значително поскапи при набавка во споредба со шпоретите со обична рерна.

Чистење на рерна без хемикалии

Чистење на рерна со оцет или лимонска киселина

Мрсните нечистотии најдобро е да се отстранат во рана фаза, пред да изгорат, и тоа со оцет или лимонска киселина. Натопете микрофибер крпа во една од овие течности и ставете ја врз масните дамки. Оцетот или лимонската киселина ја раствораат маста, па нечистотијата поради тоа лесно се брише.

Предупредување: Киселината во овие средства може да ја иритира кожата. Затоа препорачуваме при чистење на рерната да носите домаќински ракавици.

Чистење на рерна со прашок за пециво

Нашите мајки и баби користеа прашок за пециво за да ја исчистат рерната едноставно и ефикасно. На прв поглед белиот прав е вистински повеќенаменски сојузник меѓу еколошките средства за чистење на рерната. Лесно се меша со малку вода и се прави паста. Земете кесичка прашок за пециво и измешајте ја со три лажици вода. Пастата нанесете ја на валканите места и оставете да делува околу 30 минути. Потоа сè избришете со влажна крпа.

Чистење на рерна со сода бикарбона

Наместо прашок за пециво, својата рерна можете да ја исчистите и со сода бикарбона. Содата бикарбона се смета за чудотворно средство за отстранување на запечени дамки и наслаги. Хемиски, содата бикарбона е натриум-хидрогенкарбонат и исто така е составен дел на прашокот за пециво и детергентите. Кога ќе дојде во контакт со вода, почнува да пени и на тој начин ги разградува и најтврдокорните нечистотии и наслаги.

За да ја исчистите рерната со сода бикарбона, измешајте ја во однос 1:1 со вода, нанесете ја смесата на местата што треба да се исчистат и оставете да делува околу половина час. Кога сè ќе се исуши, едноставно избришете со влажна крпа.

Инаку, содата бикарбона е одлична и за полирање на шпоретот до висок сјај – само нежно избришете ги површините со сода измешана со вода.

Чистење на рерна со сол

Солта е најдобро да се користи кога нешто ќе се прелее за време на печење или пржење. За таа цел, едноставно навлажнете го дното на рерната со вода, посипете сол на валканите места и загрејте ја рерната на 50 степени. Кога солта ќе покаже кафена боја, едноставно избришете ја заедно со нечистотијата.

Чистење на рерна со сода во прав

Уште едно домашно средство кое се препорачува како ефикасно за чистење на рерната е сода во прав. Може да се набави, на пример, во продавници како што е dm, под називот сода во прав натриум карбонат.

Содата во форма на спреј можете да ја користите за чистење на решетките и ѕидовите на рерната. Измешајте малку сода со вода во шише за прскање, добро промешајте и прскате по валканите места. Ефектот се гледа веднаш. По неколку минути остатоците од нечистотијата лесно се бришат. Кај многу дебели наслаги може да биде потребно повторување на третманот.

Чистење на стаклото на рерната

На стаклото на рерната се гледаат запечени капки и масни наслаги од пареата: стаклената плоча со текот на времето станува кафеава и валкана. Тоа не е пријатно за гледање во уредна кујна. Меѓутоа, и за тоа постои решение!

Најдобро е да го исчистите стаклото на вашата рерна со прашок за пециво. Овој универзален производ ги отстранува наслагите и му го враќа сјајот на стаклото на рерната! Направете густа паста од прашок за пециво и топла вода. Потоа навлажнете ја стаклената плоча со топла вода и нанесете дебел слој паста со четка. Внимавајте пастата да стигне до аглите на стаклото. Оставете да делува околу половина час. Не вклучувајте ја рерната, бидејќи пастата би се исушила премногу брзо и не би можела да го исчисти стаклото — напротив, тоа би го отежнало чистењето. Ако пастата се суши премногу брзо, можете лесно да ја навлажните со топла вода за време на третманот, на пример така што врз стаклото ќе ставите влажна крпа. Така пастата од прашокот за пециво поддобро ќе апсорбира вода.

Во зависност од степенот на нечистотија, можеби ќе биде потребно дополнително чистење со неабразивен сунѓер. Вашето стакло ќе биде како ново!

Чистење на ѕидовите на рерната

Нечистотијата на задниот дел и страничните ѕидови на рерната настанува како резултат на топлината која делува врз масните наслаги при печење и пржење. Проблемот при чистење на вертикалните површини на рерната е што средството за чистење може да се цеди, па затоа неговата ефикасност може да биде ограничена. Најдобар начин за чистење на ѕидовите на рерната е со парeа. За тоа посебно се погодни домашни методи со средства како што се лимонов сок или сода во прав.

Околу 100 милилитри лимонов сок се мешаат со иста количина вода и се ставаат во чинија отпорна на оган, во ладна рерна. Потоа рерната се загрева на 120 степени додека течноста не испари. Содата во прав исто така се меша со вода и се користи во шише за прскање за обилно да се нанесе на внатрешноста на ладната рерна. Оставете да делува два часа, па потоа избришете.

Со овие методи темелно се чистат и тешко достапните места внатре во рерната.

Чистење на запечената рерна

Чистење на рерна без хемикалии — тоа е она што повеќето од нас го посакуваат. Особено кога постојат толку едноставни домашни средства кои се исклучително ефикасни. Сепак, сигурно има ситуации кога е подобро да се посегне по класично средство за чистење на рерна во спреј. Главната предност на овие производи е заштеда на време и труд. Денес тие се произведуваат сè повеќе еколошки прифатливо и можат повремено да бидат добра алтернатива на бабините домашни рецепти.

Во продавници како dm можете да пронајдете голем избор на класични средства за брзо чистење на рерна, како и многу други производи што ви се потребни за веднаш да ги испробате нашите совети за чистење на рерна.

Најчесто поставувани прашања

Како најдобро да ја исчистите рерната?

Во зависност од степенот на нечистотија, ставете сода бикарбона (прашок за пециво) на влажна крпа или директно во рерната, па потоа избришете со влажна кујнска или микрофибер крпа. Оставете добро да делува. Сода бикарбона или прашок за пециво можете да ставите и на плехови, па со влажна крпа да ги втриете. Откако ќе отстои, сè може да се избрише со сунѓер или крпа.

Како да ја исчистите валканата рерна?

Премногу валканата рерна можете убаво да ја исчистите со оцет и лимон, но само ако нечистотијата сè уште не е запечена. Оцетот и лимонската киселина ја раствораат маста: едноставно избришете ја површината со микрофибер крпа натопена во оцет. Запечените наслаги треба да се третираат со сода бикарбона или прашок за пециво.

Како да ги отстраните запечените наслаги од рерната?

Запечените наслаги во рерната можете да ги отстраните со сода бикарбона или прашок за пециво. Содата бикарбона се смета за вистинско чудотворно средство во борбата со тврдокорни наслаги и дамки. Измешајте сода и вода во однос 1:1, нанесете на запечените делови, оставете да делува 30 минути, а потоа избришете.

Крај на листата