Грижа за себе-Совет 5: Здрави заби, здраво тело - Холистичко (целосно) здравје на забите
Внимателно негуваните заби имаат позитивен ефект врз целокупното здравје.
Забите го обликуваат не само надворешниот, туку и внатрешниот изглед. Ако забите, непцата и вилицата се во добра состојба, тоа позитивно влијае на целиот организам. „Забите имаат големо влијание врз здравјето на телото, тие се дел од него. Не може да има здравје без здравје на забите“, пишува холистичкиот стоматолог и ајурведски доктор Annette Jasper во нејзината книга „Здравјето започнува во устата“ (издавач: Riva, 2020 година). Многу работи можете сами да направите за нега на вашите заби и да имате целосна корист од тоа. Следниве совети од книгата на забарката како и од Австриското здружение за пародонтологија ќе ви помогнат во тоа:
Инструкции: 5 совети за орална и забна хигиена
1 - Хранете се урамнотежено
Она што го јадеме влијае на забното и оралното здравје на многу начини. Плунката игра важна улога. Ги мие остатоците од храна од површината на забот и ги минерализира забите. „На овој начин плунката ја штити површината на забот“, пишува холистичкиот стоматолог Annette Jasper во својата книга. Австриското здружение за пародонтологија советува: За добро орално здравје е важно да се храните урамнотежено. Исто така, избегнувајте рафинирани шеќери како би ги заштитиле забите. Истражувањата исто така покажуваат дека одредени бобинки и сорти на зеленчук имаат антиоксидативно дејство и се добри за пародонтот. Ова ќе се погрижи за тоа да забите бидат цврсто закотвени. Сепак, за ова сè уште се прават дополнителни истражувања.
2 - Грижливо негувајте ги вашите заби
Редовното и темелно четкање на забите од рана возраст сè уште е најважното нешто за здравјето на забите. Може да биде од помош и ако стоматологот ви ја покаже правилната техника на четкање на забите. Бидејќи при четкањето на забите, не само што треба да ја исчистите нивната површина, туку и да стигнете до тешко достапните ќошиња и вдлабнатини. Ова често е полесно да се направи со електрична отколку со рачна четка за заби. Интерденталните четки се најдобриот начин за чистење на просторот помеѓу забите. Забниот конец помага кај тесните точки, сè додека нема пародонтитис - тогаш празнините меѓу забите обично се преголеми. Чистачот за јазик е дизајниран да го ослободи јазикот од бактерии и токсини.
3 - Одете на професионална орална хигиена
Со професионална орална хигиена во стоматолошка ординација се врши чистење и на оние места каде што самите не можете да стигнете. Колку често ќе биде неопходна оралната хигиена зависи од вашата ефикасност при четкањето и од тоа дали вашите заби се склони кон формирање на забен камен. Австриското здружение за пародонтологија препорачува да практикувате професионална орална хигиена најмалку еднаш до двапати годишно. Уште еден совет: Таканаречениот основен пародонтален преглед треба да се врши и при годишниот превентивен стоматолошки преглед. Тој трае само неколку минути и брзо се одредува дали е неопходен третман.
4 - Зајакнете го вашиот микробиом
Сите микроорганизми во и на човечкото тело заедно се нарекуваат микробиом. „Човечкиот организам се состои од над 100 милијарди микроорганизми. Повеќето од нив се наоѓаат во цревата, на кожата и во усната слузокожа“, пишува Annette Jasper. Здравиот микробиом има позитивно влијание и на забите и усната шуплина. Според холистичкиот стоматолог, можете многу да направите за начин на живот кој би бил погоден за микробиомот. Бидете поштедливи во однос на гелот за туширање и сапунот. Не користете производи за нега на забите и дезодоранси со дезинфекциски супстанции. Држете се начелно до природните производи за нега. Ставете растенија низ куќата, извалкајте ги рацете при работата во градината и галете го вашето куче или мачка. Ако е можно, движете се барем половина час дневно на свеж воздух и намалете го стресот.
5 - Внесете релаксација во секојдневниот живот
Некои луѓе ги стискаат и чкрипат со забите ноќе за да се ослободат од стресот. Ова за возврат може да влијае на мускулно-скелетниот систем. Затоа Annette Jasper советува да се користат вежби за релаксација и медитација во текот на денот како превентивна мерка. Според Австриското здружение за пародонтологија, забните шини исто така можат да го растоварат системот за џвакање при ноќното чкрипење со забите. Често е потребна придружна физиотерапија. Вистинските места каде би се обратиле во случај на ноќно чкрипење со забите се холистичките стоматолошки ординации специјализирани за функционална дијагностика. Истражувањата исто така покажаа дека проактивно справување со проблемите и стресот ја подобрува состојбата на непцата.
Добро е, бидејќи:
- позитивно влијае на надворешниот изглед
- ги одржува здрави забите и усната шуплина
- има позитивен ефект врз целиот организам