Кој е вистинскиот заштитен фактор за вас?

Пресметајте го сами заштитниот фактор: Каков тип на кожа имате е најважно за одредување на идеалниот заштитен фактор.

Без разлика дали крем, спреј, пена за сончање...сите овие производи имаат нешто заеднично: Заштитниот фактор, кој е најважен за одредувањето на правиот производ за вас. Но што точно значи овој мистериозен број на пакувањата? И како да одредиме кој е правиот за нас?

Колку долго кожата сама се штити од сонцето? 

Секоја кожа има свое иднивидуално време на заштита. Тоа значи дека кожата може да биде изложена на сонце одредено време, без да биде оштетена од него. Зависно од типот на кожата, пигментацијата и интензитетот на сонцето, ова време е различно кај секого.

Каков тип на кожа имате вие? 

Научно се зборува за шест типови на кожа. На европското тло вообичано се разликуваат четири типови. Тие се одредуват преку карактеристки како кожа, коса, очи и интензитет на потемнување, односно изгорениците од сонце. Времетраењето на сопствената заштита на кожата од сонце е пресметано според изложеноста на пладневното сонце во лето во Централна Европа. Во тропските предели, на море или на планина ова време е секако многу пократко.

Тип I:

Црвенкасто-руса коса, светли очи, многу светол тен и сончеви пеѓи, секогаш гори на сонце и не потемнува.
Времето на сопствена заштита е помеѓу 3 и 10 минути.

Тип II:

Руса коса, светли очи, светол тен, чести сончеви пеѓи, речиси секогаш гори на сонце и слабо потемнува.
Времето на сопствена заштита е помеѓу 10 и 20 минути.

Тип III:

Темноруса кон кафена коса, среден тен, светли или темни очи, ретко гори и добро потемнува.
Времето на сопствена заштита е помеѓу 20 и 30 минути.

Тип IV:

Темнокафена или црна коса, темен тен, темни очи, речиси никогаш не гори и секогаш потемнува.
Времето на сопствена заштита е околу 45 минути.

Како да го пресметаме заштитниот фактор?

Сончевиот фактор ни покажува, колку долго, вон рамките на времето на сопствента заштита на кожа, може да се задржиме на сонце, без да се здобиеме со изгореници. Со оваа формула многу лесно може да го пресметате заштитниот фактор:

Посакувано задржување на сонце : Време на сопствена заштита = Заштитен фактор

На пример:
Доколку сте Тип III, чија сопствена заштита трае околу 20 минути и сакате да поминете 3 часа (180 минути) на сонце, тогаш: 180:20= З.Ф. 9

Обратно, можете секако да пресметате колку време можете да се задржите на сонце со одреден крем за сонце, односно, 20х9=180 минути.

Кога ќе помине ова време, треба да се тргнеме од сонце. Доколку сакаме повеќе да потемниме, сончањето треба да го одложиме за друг ден.

Напомена: оваа формула не е применлива за деца, бидејки детската кожа е почувствителна и потребен ѝ е повисок заштитен фактор.