Менопауза: Симптоми и тегоби

• Почеток на менопаузата - први знаци
• Типични симптоми на менопаузата и нивно лекување
• Симптоми на менопаузата: колку долго?
• Менопауза: симптоми, но и предности

Почеток на менопаузата - први знаци

Како прво: Менопаузата генерално не значи време на страдање. Само околу една третина од жените се погодени од силни тегоби. Другата третина има благи симптоми, а последната третина речиси и не ја забележува сопствената менопауза. Во просек, жените ја имаат последната менструација на 51-годишна возраст. Сепак, првите знаци може да се појават неколку години пред тоа. Тие ги вклучуваат следните промени или симптоми:

• Неправилни менструации: пократки, подолги, потешки, полесни - сè е можно. Сè почесто, крварењето целосно изостанува.
• Топли бранови: Ненадејната зголемена топлина е еден од најсигурните знаци дека поминувате низ менопауза. Сè уште не е објаснета точната причина за здодевните топлотни бранови.
• Ноќно потење: Топли бранови во текот на ноќта доведуваат до тоа да жените во менопауза се будат облеани во пот.
• Сувост на вагината: Намаленото производство на хормонот естроген предизвикува слузницата во гениталното подрачје да стане посува и потенка.
• Промена на расположението: Психичките подеми и падови им се познати на повеќето жени уште од менструалниот циклус. За време на менопаузата, многумина доживуваат слични промени во расположението.

Постојат и други физички и психички тегоби кои ѝ се припишуваат на менопаузата. Сепак, ова се често симптоми или болести кои се зголемуваат со возраста - и кај жените и кај мажите.

Типични симптоми на менопаузата и нивно лекување

Секоја жена различно ја доживува менопаузата. Здравствената и психичката состојба имаат големо влијание врз можните тегоби: здравата исхрана, многу движење, исполнет социјален живот и професионален успех придонесуваат за ублажување на можните симптоми на менопауза. Сепак, и со домашни лекови и паметни трикови можете да ги ублажите или избегнете најчестите тегоби.

Топлотни бранови и ноќно потење

Доаѓаат ноќе или дење сосема неочекувано и често ве оставаат облеани во пот и со црвено лице – се работи за озлогласените топлотни бранови. Тие често се придружени со вртоглавица или срцебиење. Спречете ги напливите на пот - со долна облека и постелнина која дише, како и со повеќеслојна облека. Ако капки пот течат по челото, студената вода на внатрешната страна на зглобовите на рацете или обична лепеза можат брзо да ја поправат ситуацијата. Во тешки случаи би можела да помогне и терапија со замена на хормони. Советувајте се за тоа со вашиот лекар.

Сувост во гениталната зона

Ако вагината е премногу сува, тоа може да доведе до чешање и печење. Иако влажнењето при сексуалната возбуда се случува и за време на менопаузата и по неа, може да дојде до иритација за време на сексот. Лубрикантите и специјалните вагинални креми успешно ги ублажуваат и спречуваат тегобите како горење или чешање.

Нарушувања на циклусот

Менструацијата доаѓа многу порано отколку што очекувавте или доцни со денови? Тоа ве прави нервозни. Сепак, останете смирени и преземете мерки на претпазливост: Спакувајте влошки, тампони или менструалната чашка во вашата чанта за да не ве начека менструацијата неподготвени. Функцијата на јајниците опаѓа во текот на менопаузата. Нередовноста не е невообичаена. Ако менструацијата ви изостанува дванаесет месеци, вие се наоѓате во таканаречената постменопауза, една од четирите фази на менопаузата.

Слабост на мочниот меур и инфекции

Уринарната инконтиненција не е нужно симптом на менопауза, туку е поврзана со спуштањето на матката и мочниот меур како резултат на возраста и породувањето. Ефективниот тренинг на карличното дно, што се препорачува по породувањето, помага против уринарната инконтиненција. Но, поради хормоналната промена слузниците на уринарниот тракт и мочниот меур стануваат потенки, така што почесто може да се појават инфекции на мочниот меур и уринарниот тракт.

Нарушувања на спиењето

Дали се будите среде ноќ и лежите будни или воопшто не можете ни да заспиете? Ова може, но не мора да има никаква врска со менопаузата. Колку сте постари, толку почесто доаѓа до нарушувања на спиењето. Погрижете се да имате редовен ритам на спиење, избегнувајте алкохол пред спиење и движете се доволно на свеж воздух. Лековитите билки како што се валеријана, маточина, хмељ или лаванда исто така можат да ви помогнат да заспиете и да се наспиете бидејќи им се припишува смирувачки ефект. Мелатонинот (на пр. во форма на капсула) исто така придонесува да се скрати времето потребно за заспивање.

Промени на расположението

Замор, немир, лутина, фрустрација - фактот дека еден дел од животот завршува и почнува нов, предизвикува нејасни стравови кај многу жени. Се чувствувате потиштено, непривлечно, па дури и бескорисно. Доколку имате чувство дека не можете сами да се извлечете од ова нерасположение, треба што поскоро да побарате стручна психолошка помош. Но, честопати споделувањето со пријателките, некое ново хоби или долго сонуваното патување помагаат да се ослободите од мрачните мисли.

Симптоми на менопаузата: колку долго?

Симптомите на менопаузата може да започнат неколку години пред вистинската менопауза – последното крварење - и да продолжат една или две години потоа. Севкупно, менопаузата трае во просек од пет до осум години. Ако изостанала менструацијата 12 месеци, тогаш се наоѓате во постменопауза и симптомите на менопауза полека, но сигурно се намалуваат.

Менопауза: симптоми, но и предности

Останува мистерија зошто за менопаузата и симптомите на менопауза сè уште многу воздржано се зборува, ако и воопшто. Едно е сигурно: таканаречениот климактериум е природна фаза во животот на жената, која повлекува драстични промени. Тие обично се придружени со добро познати симптоми како што се топлотни бранови, пропуштени менструации и промени на кожата и слузниците. На многумина им треба малку привикнување, но дефинитивно има и позитивни страни: ПМС-симптомите и менструалните грчеви се веќе минато. Можете да уживате во вашата сексуалност без да размислувате за пилули, спирали или кондоми.