Здрави нокти

• Како изгледаат здравите нокти?

• Најчести промени на ноктите

• Што да направите за здрави нокти?

• Хранливи материи за здрави нокти

Како изгледаат здравите нокти? 

Негуваните и здрави нокти, кожа и коса значително придонесуваат за нашиот надворешен изглед. Освен тоа, тие се огледало на нашата добросостојба. Стресот, лошото чувство или нездравата исхрана може да се одразат на ноктите, како и на кожата и косата. Но, како всушност изгледаат здравите нокти? 

• Нивната површина е мазна, благо сјајна и има розева боја. 

• Здравите нокти имаат светол, рамномерно оформен полумесец. 

• Тие се еластични, цврсти и немаат ниту бразди ниту дамки. 

Надворешните влијанија како студеното време, честото миење на раце или агресивните средства за чистење можат да им наштетат на ноктите. И редовната употреба на средства за дезинфекција на раце може негативно да влијае на нивната состојба.

Најчести промени на ноктите 

Промените на ноктите се чести и можат да имаат различни причини. Во секој случај треба сериозно да ја сфатите состојбата на вашите нокти, бидејќи промените можат да бидат и знак за заболувања. Доколку се двоумите, побарајте совет од лекар. 

Меки и кршливи нокти 

Ноктите се кршат или пукаат. Тоа може да има наследни причини или да биде резултат на неправилна нега или нездрава исхрана. И користењето на вештачки нокти на подолг рок влијае врз здравјето на природните нокти. 

Бели дамки 

Долго време се сметаше дека белите дамки на ноктите се знак за недостаток на калциум, но тоа не е точно. Овие светли промени претставуваат празнини или воздушни меури кои настануваат како резултат на мали повреди на ноктот. Обично со растењето на ноктот тие исчезнуваат сами. 

Бразди 

Се разликуваат попречни и надолжни бразди: попречните бразди се знак за нарушен раст, често како последица на болест. Причината може да биде безопасна инфекција, но и труење на организмот, како на пример при хемотерапија. Надолжните бразди, пак, се појавуваат со возраста и се сосема нормални. 

Што да направите за здрави нокти 

Ако страдате од безопасни промени на ноктите, обично можете сами да ги решите. Сепак, потребно е трпение, бидејќи ноктите растат многу бавно: во просек само три милиметри месечно. Затоа е потребно време додека дамките или браздите пораснат и исчезнат. 

Правилна нега 

Ноктите имаат потреба од редовна и нежна нега, исто како косата и кожата. 

• Турпирајте ги ноктите наместо да ги сечете или кратите со грицкалка. 

• Мачкајте ги ноктите и рацете со хранлива крема по секој контакт со вода и навечер пред спиење. 

• Одржувајте ги кршливите нокти кратки. 

• Носете ракавици при контакт со средства за чистење. 

• Користете средство за отстранување лак без ацетон ако често ги лакирате ноктите. 

• Редовно нанесувајте масло за нокти. 

• Избегнувајте вештачки нокти. 

Особено во зимските месеци, ноктите имаат потреба од многу нега. Поради сувиот воздух, тие губат влага и се сушат. Специјално масло за нокти или бадемово масло помага да се обноват кршливите нокти и испуканата кожичка околу нив. 

Убави нокти преку здрава исхрана 

Природната убавина доаѓа одвнатре. Затоа избалансираната исхрана е многу важна за состојбата и изгледот на телото. Често кршливите нокти се знак за недостаток на хранливи материи. 

Ноктите се состојат од кератин – протеин кој е и главен градбен елемент на косата. Затоа исхрана богата со протеини и витамини е особено важна за здрави нокти. Такви материи има, на пример, во мешунките и јаткастите плодови. Ова е особено важно ако се храните вегански. Овошјето и зеленчукот исто така го снабдуваат телото со важни витамини.

Хранливи материи за здрави нокти 

За вашите нокти да бидат или да останат здрави и силни, потребно е време – и вистински хранливи материи кои го поддржуваат нивниот раст и цврстина. Тоа се: 

• Протеини: Бидејќи ноктите се составени од кератин, им се потребни протеини. Исхрана богата со протеини може да го подобри нивното здравје. 

• Железо: Тенки, искривени или набраздени нокти можат да бидат резултат на недостаток на железо. Намирници како црвено месо или темнозелен лиснат зеленчук помагаат. 

• Цинк: Го поддржува растот и цврстината на ноктите. Жените треба да внесуваат најмалку 10 мг дневно, на пример преку семки од тиква, овес или остриги. 

• Силициум: Може да придонесе за здрави нокти. Јадете намирници како овес, суви урми, зелена боранија или бамбусови никулци. Помага и силициум во форма на додаток. 

• Биотин: Овој витамин од групата Б му помага на телото да ги искористи аминокиселините важни за протеините – резултат се посилни нокти. Го има во блитва, јајца, интегрални производи и лосос. 

• Витамин А: Го поттикнува метаболизмот на железото и може да помогне кај меки и кршливи нокти. Се наоѓа во шарен зеленчук, спанаќ, кајсии и манго. 

Не сите хранливи материи лесно се внесуваат преку исхрана. Понекогаш додатоците во исхраната помагаат да се одржи балансот.