Време е за бања на стапалата 

• Бања на стапалата: вистински одмор

• Придобивки од бања на стапала

• Бања со сода бикарбона

• Повеќе рецепти

• Совети

Одмор за стапалата 

Лицето, косата, рацете и телото обично во секојдневието добиваат доволно нега. Стапалата, пак, често се како „Пепелашка“, иако прават толку многу. Нашите стапала дефинитивно заслужуваат исто толку внимание. 

Со бања за стапалата им дарувате на вашите стапала дополнителна нега во текот на целата година. Особено во зима ова е важно: цврстите чевли и дебелите чорапи речиси не им оставаат простор да „дишат“ и да се движат. Поради тоа страдаат кожата и ноктите. Топлата  бања ја поттикнува циркулацијата и ја прави кожата мекa како свила. 

Предности на бањата за стапала 

Ако сакате да направите нешто добро за вашите стапала, треба еднаш до двапати неделно да правите бања. Температурата на водата не треба да надминува 38 степени. 

Придобивки 

Бањата за стапала ја опушта и ја поттикнува циркулацијата. Ја омекнува кожата на стапалата и така ги подготвува оптимално за педикир. Помага полесно да заспиете. 

Проблеми со стапалата како испукана кожа, задебелена кожа, потење на стапалата или габични инфекции можат да се спречат со редовни бањи. 

Без разлика дали имате ладни, потни или груби стапала – исплатливо е сами да си направите бања. Повеќето состојки веројатно веќе ги имате дома. 

Правилен сад  

За бањата ви е потребен голем сад во кој има место за стапалата. Можете да користите, на пример: 

• мали садови за перење или леѓен 

• обични пластични садови или кофи 

• професионални садови за бања со или без функција за масажа или меурчиња 

Ако редовно правите бањи, исплатливо е да купите уред со вибрациона и воздушна масажа. Некои модели имаат дури и вградено греење, така што водата не се лади. 

Бања на стапалата со сода бикарбона 

Многу луѓе имаат проблем со задебелена кожа на стапалата. За дебела и тврда задебелена кожа, бањата со сода бикарбона е одлично решение. Освен тоа, при редовна употреба, бањата со сода може да помогне во регулирање на киселинско-базната рамнотежа. 

Како се прави 

• Додадете една лажица сода бикарбона во топла вода и добро промешајте. 

• Стапалата треба да стојат во бањата околу 20 до 30 минути. 

• Потоа можете лесно и нежно да ја отстраните задебелената кожа. 

Совет: По бањата со сода бикарбона користете камен за педикир. Ако стапалото има тврда и задебелена кожа, вратете го веќе третиранoто стапало повторно во бањата додека го негувате другото, а потоа повторете ја постапката. 

 Повеќе рецепти 

Со природни состојки можете да се справите со многу проблеми со стапалата. Едноставно пробајте и уверете се. 

Релаксирачка бања против стрес 

Оставете го стресот од денот зад себе и едноставно опуштете се: најдоброто средство против напнатост е смирувачка бања пред спиење, на пример со масло од лаванда. 

Како се прави: 

• Измешајте осум до 15 капки масло од лаванда со четири лажици павлака или млеко. 

• Потоа додајте ја течноста во водата. 

Антибактериска бања против потни стапала 

Потните стапала се навистина непријатни. Но, за среќа има решение: јаболковиот оцет може да делува антибактериски и противвоспалително и да помогне во регулирање на природната pH-вредност на кожата. 

Како се прави: 

• Сипете 500 мл јаболков оцет во пет литри топла вода. 

• Држете ги стапалата во бањата околу 20 минути. 

Освежувачка бања против уморни нозе 

По долг ден или ноќ помината на нозе, на вашите стапала им е потребна освежувачка бања. Освежувачки и стимулирачки ефект имаат етерични масла од нане или цитрус. 

• За освежителна бања, измешајте сок од еден портокал со три лажици урда. 

• Рамномерно измешајте ја смесата во топлата вода. 

• За уште поинтензивен мирис, исечкајте свежи кори од портокал и додајте ги во бањата. 

Зајакнувачка бања за подобра циркулација 

Ако во зима страдате од ладни стапала, можете да ја подобрите циркулацијата со бања со ѓумбир. Ѓумбирот исто така може да го зајакне имунитетот и да делува противвоспалително. 

Како се прави: 

• Исечете корен од ѓумбир на тенки парчиња и варете го 15 до 20 минути во 200 мл вода. 

• Процедете ја течноста и додајте ја во топлата бања. 

Совет: Ако дополнително ги масирате стапалата со благ пилинг, ќе ја подобрите циркулацијата и ќе ја отстраните мртвата кожа. 

Негувачка бања за меки стапала 

Стапалата не го сакаат зимскиот период. Често се во дебели чизми и ретко доаѓаат во контакт со свеж воздух. За кожата да остане мека, потребна е посебна нега: медот и млекото ја негуваат оптоварената кожа. 

Како се прави: 

• Растворете две мали лажички мед во една шолја млеко (доколку медот е тврд, малку загрејте го млекото). 

• Додајте ја смесата во бањата. 

• Кај многу суви стапала, можете да додадете и чист мед директно во топлата вода. 

 Совети  

Ако користите домашно направени додатоци за бања, етеричните масла прво треба да се измешаат со емулгатор. Инаку ќе пловат како капки на површината на водата. Како емулгатори се погодни, на пример, млеко или мед. 

Температурата на водата за бања на стапалата треба да биде помеѓу 36 и 38 степени. 

Уживајте во бањата од 10 до 20 минути. 

Потоа добро исушете ги стапалата. Намачкајте ги со хранлива крема за стапала и одржувајте ги топли. 

За максимална релаксација, планирајте одмор од околу 30 минути по бањата. 

Совет: Важно е редовно да ги мачкате стапалата со крем, а по потреба да ставите и маска за стапала преку ноќ. И кокосовото масло може да ги направи стапалата меки: едноставно намачкајте ги по бањата и најдобро облечете чорапи.