Недостаток на железо за време на менструацијата

• Недостаток на железо кај жените
• Последици од недостаток на железо
• Недостаток на железо за време на менструацијата: Симптоми
• Недостаток на железо за време на менструацијата: Совети

Недостаток на железо кај жените

Железото е есенцијален минерал којшто нашето тело не може самото да го произведе. Тоа значи дека треба да го внесеме. Ова обично се случува преку исхраната. Ако телото добива премалку железо во подолг период, може да настане дефицит на железо. Во Европа, ова особено ги погодува жените во репродуктивна возраст - т.е. оние со менструално крварење - како и бебињата и малите деца во развој.

Задачи на железото во телото

Железото учествува во многу витални метаболички процеси во телото. Меѓу најважните задачи се вбројуваат:

• транспорт на кислород преку формирање на крв
• зајакнување на имунолошкиот систем преку формирање на имунолошки клетки
• одржување на когнитивните функции (меморија, концентрација, ментални способности)
• снабдување на клетките со енергија

Дефицитот на железо е честа болест на недостаток и затоа треба да се има на ум.

Причини за недостаток на железо кај жените

Причините за недостаток на железо кај жените можат да бидат многу различни. Анемијата со дефицит на железо може да ги има следните причини:

• обилно менструално крварење
• исхрана сиромашна со железо, како што е веганска или вегетаријанска исхрана
• бременост и период на доење
• болести кои ја спречуваат или нарушуваат апсорпцијата на железо
• вроден дефицит на железо
• земање одредени лекови

Често и повеќе од овие фактори се собираат во исто време и нивните причини може да бараат медицинско појаснување.

Потреба за железо кај жените 

На жените генерално им требаат околу 15 мг железо дневно. Нивото на потреба зависи од возраста и животната ситуација. За време на нормална менструација, жената обично може да загуби помеѓу 2,5 и 40 мг железо. Кај жени со претерано обилно менструално крварење (хиперменореа), оваа загуба на железо може да се зголеми и мора соодветно да се компензира.

Последици од недостаток на железо

Обилната менструација е најчестата причина за недостаток на железо кај жените. Дополнителни фактори на ризик се долготрајната менструација од повеќе од седум дена (менорагија) како и краткиот циклус со интервал помеѓу менструалните периоди помал од 25 дена (полименореа).

Ако телото се снабдува со премалку железо, секогаш прво ги црпи своите резерви. Ако тие се потрошат, важните метаболички процеси во телото може повеќе да не функционираат: Под одредени околности, може да се појави анемија и недоволно снабдување со кислород на одделните органи.

Недостаток на железо за време на менструацијата: Симптоми 

Во најчестите знаци на анемија со дефицит на железо се вбројуваат:

• замор, вртоглавица, слабост
• бледило
• ограничени способности
• потешкотии со концентрацијата
• отежнато дишење и палпитации

И нашиот надворешен изглед може да страда од недостатокот на железо: косата може да паѓа, ноктите да станат кршливи, кожата може да стане груба и аглите на устата да испукаат.

Ако страдате од еден или повеќе од овие симптоми, треба да посетите лекарска ординација. Обично прво треба да се направи крвна слика. На овој начин може да се постави позначајна дијагноза. Доколку е присутна анемија со дефицит на железо, следуваат дополнителни испитувања за да се открие причината за недоволното внесување на овој минерал.

Недостаток на железо: Изостанок на менструација 

Тешкиот недостаток на железо може да доведе и до послаба менструација или целосно отсуство на менструално крварење. Во овој случај, треба да побарате и лекарски совет како да ја вратите рамнотежата на железото.

Недостаток на железо за време на менструацијата: Совети

Третманот обично се состои од земање додаток на железо на одреден временски период. Земањето железо за време на менструацијата е можност да се компензира загубата. Во исто време, сепак треба да се обидете преку исхраната да го зголемите внесот на железо.

Внесување на железо преку исхраната 

Само преку исхраната најчесто не може да се компензира недостатокот на железо предизвикан од менструацијата. Сепак, генерално можете да му потпомогнете на вашето тело преку исхрана богата со железо. Храната што содржи железо вклучува:

• месо
• риба
• јаткасти плодови
• мешункасти плодови
• ленено семе
• боровинки
• суви кајсии

Храната која содржи витамин Ц може на телото да му ја олесни апсорпцијата на железо. Затоа прехранбените продукти богати со железо комбинирајте ги со овошје или зеленчук како што се портокали, јагоди, киви, прокељ, брокула или келераба.

Сепак, некои видови храна и пијалаци може да ја попречат апсорпцијата на железото ако се консумираат во исто време со него или набргу потоа. Тука спаѓаат, на пример, чај, кафе, црвено вино, ориз и млеко. 

Третман на обилни менструални крварења

Ако причината за дефицитот на железо е натпросечно обилно или долго менструално крварење, медицината знае различни опции за третман, како на пример:

• Хормоналните контрацептиви (апчиња, спирала) може да ja ослабат менструацијата бидејќи можат да го намалат растот на слузницата на матката.
• Лековите може да го намалат менструалното крварење.
• Хируршки интервенции како што се отстранување или склеротерапија на слузницата на матката како и отстранување на матката се вршат само ако тегобите се многу тешки.

Сепак, овие третмани доаѓаат предвид само ако не постои желба за раѓање деца.