Гадење, киселини и слично: Што да направите ако имате такви тегоби во бременоста?

Организмот прави вистински чуда за време на бременоста. Во ниту еден друг период телото не се менува толку многу во рок од неколку месеци. Тегобите се сосема нормални. Но, што да се прави во врска со тоа? Ја интервјуиравме акушерката Eva Kranvogel-Kowarik, која исто така одговара на прашања од (идните) родители за Milupa Eltern + Baby Service.

Прв симптом на бременост: осетливост на градите

Поради хормоналната промена, на почетокот на бременоста дојките веќе се подготвуваат за доење. Градник кој добро лежи ги поддржува градите и ги штити чувствителните брадавици од триење. Но, исто така дотокот на воздух и студениот туш, како и нежна хранлива масажа со добар лосион за тело или висококвалитетно масло како дел од негата на телото му помага на ткивото на дојките и го поддржува растегнувањето.

Што да правите со гадењето за време на бременоста?

Осум од десет жени страдаат од гадење во раните фази од бременоста. Во принцип, непријатниот несакан ефект е сепак добар знак: Тоа значи дека имате многу хормони за бременост. И: Мачнините обично сами од себе исчезнуваат околу четвртиот месец од бременоста.

Експертката советува: „ Наутро уште пред да станете изедете мал појадок во кревет. Малку вода, сок од портокал или чај и суви бисквити или двопек нека ви бидат спремни на ноќното ормарче уште од претходната вечер. Јадете мали порции и во текот на денот и пијте доволно течности. Ѓумбирот помага и против гадење, на пр. како чај или можете и да го џвакате. Хомеопатијата, акупресурата или ароматерапијата (шишенца за мирисање или капка масло од нане или лимон на марамче) исто така може да помогнат“.

Како да се борите против заморот?

Одредена количина на замор е нормална, пред сè во првиот триместар. Хормоналните промени и растот на ембрионот бараат енергија. „Одморете се - и нека вашиот матичен лекар го провери нивото на железо и функцијата на тироидната жлезда“, советува Eva Kranvogel-Kowarik. „Доколку е неопходна замена на железо, пијте црвен сок од билки од аптека и комбинирајте овошен сок кој содржи витамин Ц, особено со храна од растително потекло, за да ја зголемите апсорпцијата на железото.“

Што делува против киселини?

Поради олабавувачкиот ефект на хормоните за бременост, влезот во желудникот веќе не е целосно затворен и желудочната киселина може да предизвика рефлукс. Симптомите обично исчезнуваат во вториот триместар од бременоста, но понекогаш и се враќаат на крајот од бременоста. Бидејќи: Кон крајот на бременоста, на нероденото дете му треба толку многу простор што матката која станува сè поголема го притиска стомакот. Притоа сфинктерниот мускул на желудникот може полесно да се отвори, а желудочниот сок може да се крева нагоре. Во овие случаи, акушерката препорачува избегнување на кафе, слатки, чоколадо и тестенини од свеж квасец како и масна храна. Тоа е затоа што овие намирници го стимулираат производството на желудочна киселина.

Од друга страна, чајот од анасон и варен зеленчук како брокула, моркови и компири со ориз го смируваат желудникот. Обидете се внимателно да откриете која храна не ја поднесувате добро.

Како итна помош, Eva Kranvogel-Kowarik советува да џвакате неколку бадеми, да пиете млеко голтка по голтка, да џвакате семе од синап или дури и да лижнете малку сенф од тубата. Ова помага да се врзе вишокот на стомачна киселина. Исто така, спијте со горниот дел од телото поткренат со помош на втора перница.

Што помага при задршка на течности?

За ублажување на симптомите на задршка на течности помага многу движење, како на пр. одење на прошетка на свеж воздух или контрастно туширање од прстите на нозете до колковите. Здравата, балансирана исхрана, многу течности и диуретски билки, како што е селен (Levisticum officinale), помагаат против задршка на течности. „Во случај на таканаречен едем, редовно контролирајте го крвниот притисок и внимавајте на излачувањето на протеините во урината“, вели експертката.