Да појасниме: ова може да помогне против повреди при раѓање

Породувањето е прекрасно искуство. Емотивно, исцрпувачко и уникатно. Понекогаш придружено и со породилни повреди. Акушерката Ivonne Teufl објаснува како идните мајки можат да го спречат тоа.

Многу фактори се во игра

„Дали ќе дојде до повреда за време на породувањето, првенствено зависи од еластичноста и состојбата на мајчиното ткиво. И големината на главата и на рамениот појас на детето исто така игра улога“, објаснува Ivonne Teufl, акушерка во болницата Hallein, хонорарец во групната пракса во Hof кај Salzburg и во Институтот за раѓање и семејство - EigenSinn. 

Меѓутоа, во некои случаи, расцепувањето на перинеумот може да се избегне преку превентивни мерки, а особено преку инструкциите на акушерката во последната фаза од породувањето и од факторот време.

Сепак, нема гаранција. „Доколку во втората породилна фаза (експулзија) останува малку време, затоа што детето не е доволно снабдено со кислород, акушерката мора да ѝ наложи на родилката да го турка бебето со контракциите за да го заврши породувањето што е можно побргу“, вели експертката. Сепак, постојат фактори кои го потпомагаат раѓањето без повреди.

5 Совети за превенција од повреди при породување

❤ Размислете за практикување на редовна масажа на перинеумот во последните три до пет недели пред породувањето - најмалку три до четири пати неделно по 5 до 10 минути. Според една студија, масажата со истегнување може да ја намали зачестеноста на повреди, особено кај прворотките. Најдобро е да користите специјални масла за масажа на перинеумот за да го избегнете непријатното триење.

❤ Тренирајте го карличното дно пред породувањето. Мускулот кој е добро снабден со крв е поотпорен и исто така му помага на вашето бебе да дојде во вистинската положба при раѓањето. И: Вежбајте да го релаксирате карличното дно. 

❤ При породувањето внимавајте на тоа, која поза за раѓање е најдобра за вас. Сепак, исправена положба, како што се клечење, стоење, клекнување на колена или стоење на сите четири, го опушта перинеумот. Лежечката положба повеќе го оптоварува. 

❤ Можеби размислувате за породување во вода: во вода ткивото омекнува и станува особено еластично. 

❤ Соработувајте добро со вашата акушерка. Акушерката ќе се обиде да го заштити ткивото со употреба на масла и топли облоги. Постојаното притискање исто така може премногу брзо и силно да го напрегне перинеумот. Вшмукувачката чаша и епидуралната анестезија исто така го зголемуваат ризикот од повреда на перинеумот.

А парните бањи со цветови од сено? „Некои трудници посипуваат цветови од сено во водата за капење за да го омекнат ткивото за породувањето. Ова веројатно се должи на широкото дејство на топлата вода, ефикасноста на цветовите од сено не е докажана“, вели Ivonne Teufl.

Што ако тоа сепак се случи?

Тогаш добрата вест: Слузницата во интимното подрачје е извонредно добро снабдена со крв (слична на непцата) и затоа е исто така и многу способна за регенерација. Во првите неколку недели по раѓањето, раната зараснува многу брзо. Препораките на Ivonne Teufl за овој период:

Ставете 10 капки чисто есенцијално масло од лаванда во шише од 1,5 литар, наполнете со вода од чешма и со тоа исплакнете се секој ден по одењето во тоалет. Не носете синтетичка долна облека, туку подобро памук. Не користете пластични или лепливи ленти за влошки. Подоцна можете да ја масирате лузната со масло од кантарион. 

„И дефинитивно препорачувам постнатални вежби за повторно зајакнување на мускулите на карличното дно и зголемување на чувствителноста – од четвртата недела по нормално породување и од осмата недела по царски рез“, советува акушерката.