Точно или погрешно? Митови за бебињата и породувањето

За многумина, бебето е најубавиот подарок што може да се замисли. Но, има многу народни мудрости и митови околу породувањето и бременоста.

Првото дете обично доаѓа предоцна. Секое бебе чини еден заб. И: Ако нероденото дете има многу коса, мајката ќе добие киселина. Суеверни приказни или има малку вистина во нив?

За време на породувањето и бременоста - особено кога се работи за прво дете - идните мајки тешко можат да се спасат од добронамерни совети, изреки и мудрости. Многу се зборува, многу се претпоставува и многу се знае. Но, што се крие зад тоа, од каде потекнуваат митовите, дали воопшто ги има и дали тие на крајот на краиштата се блиску до вистината? dm заедно со акушерката Marion Sonneck одблиску се осврнаа на 6-те најчести митови:

1. Момче или девојче? Стомакот ќе каже

Ако стомакот делува шилесто, би требало да биде момче; ако е позаоблен, родителите можат да се радуваат на девојче - барем така вели народната мудрост. „Сето тоа се бесмислици“, во секој случај се согласуваат експертите. Нема научни докази за поддршка на тврдењето. Токму напротив: Уште во 1999 година, истражувачите од еден американски универзитет докажаа дека нема врска помеѓу обликот на стомакот и полот на бебето. За ова одлучувачки се хормоните за бременост и ширината на карлицата.

2. Бебињата со коса предизвикуваат киселини

И ова, исто така, треба да се класифицира во категоријата митови: Децата со многу или долга коса предизвикуваат киселини (жиговина, рефлукс) кај мајката, барем така се вели. Бесмислици! Киселината потекнува од желудникот, а не од матката. Хормоните го забавуваат варењето, желудочната киселина останува подолго во стомакот и на тој начин може полесно да влезе во хранопроводот.

3. На девојчињата им треба повеќе време да се родат

Девојките се суетни, совршено стилизирани и секогаш им треба многу време во бањата. Тоа се предрасуди на кои не се имуни ниту неродените девојчиња. Меѓу народот се вели дека на девојчињата им треба подолго време да се родат затоа што треба уште да се „подготват“. Бесмислица: Времетраењето на породувањето секако не зависи од полот.

4. Темна линија на стомакот претскажува близнаци

Тоа би било извонредно пророштво за бременост. Се вели дека само идните мајки кои носат близнаци добиваат темна линија на стомакот, таканаречената linea fusca. Тоа не е точно! Без разлика дали се работи за едно дете, близнаци, тројки, момче или девојче - линијата секако не зависи од тоа. Всушност, тука се вклучени и хормоните. Причина: За време на бременоста се произведува повеќе меланин што е хормонално условено.

5. Секое дете чини по еден заб

Се разбира! И во овој случај, се работи повторно за нашите драги хормони. Поради нив се менува составот на плунката, бактериите можат подобро да се размножуваат, а со тоа идните мајки се всушност поподложни на добивање кариес. Сепак, трудниците не мора веднаш да стравуваат од губење на забите. И во овој случај превенцијата е подобра отколку последователната нега: Едноставно обрнете посебно внимание на внесот на калциум и почесто посетувајте го стоматологот.

6. Момчињата ѝ подаруваат утринска мачнина на мајката

Мајките на момчињата мора особено да се борат со мачнините за време на бременоста? Не може баш така да се каже! Меѓу народот кружи и спротивното тврдење, имено дека утринската мачнина треба да укажува на девојче. Значи и во овој случај повторно: приказни за мали деца. Не постои поврзаност помеѓу полот на бебето и непријатноста во бременоста. Наместо тоа, непријатноста се поврзува со хормонот за бременост HCG, кој се произведува во поголема мера за време на бременоста.